Interskole 2022: Herleef & Herinterpreteer…
Die Interskole 2022 week vir Hoër Meisieskool nader die einde. Gister was ‘n heerlike dag wat begin het met ‘n BigBrag, voortgesit is met aksie-belaaide netbal en hokkie en geëindig het met ‘n heerlike ouer bring-en-braai. Aan die einde van hierdie besondere dag wou ek graag iets skryf oor die erfenis van interskole en HMS Paarl se deelname daaraan. Ek wou iets skryf oor hoe ons, ons ryke tradisie laat herleef het.
Ek het begin navorsing doen. Ek wou meer weet oor HMS se eerste wedstryde en deelname aan interskole. Ons praat baie van die die ryke tradisie en al die herinneringe, maar oor die algemeen weet ons nie veel daaroor nie. Die resultate wat vassteek is ook net die van die HJS/ Gim wedstryde. As jy terugdink sou jy jouself kon flous dat Interskole slegs tussen HJS en Gimnasium plaasvind. Hierdie idee word versterk deur die media. Soek jy inligting op die internet ongeag jou soekwoorde, is die resultaat eenvormig dat Interskole gaan oor die rugby wedstryd op Faure stadion die Saterdagmiddag..
Volgens media berigte het interskole tussen HJS Paarl en Paarl Gimnasium (Seunskool) al in 1915 begin, maar nie in sy huidige formaat nie. Spanne het bestaan uit onderwysers, old boys en leerders en eers van 1929 het die fokus verskuif na wedstryde wat slegs deur leerders gespeel word. Wel, wat van Hoër Meisieskool,vra julle? Teen wie het hulle interskole gespeel? Ons almal weet dat Paarl Gimnasium tot en met 1964 slegs ‘n seunskool was en minder bekend het HMS tot en met dan eintlik teen La Rochelle meegeding en ander skole in die Wes-Kaap.
Natuurlik in ‘n manlik gedomineerde wêreld is daar minder ag geslaan op die meisieskole se prestasies. ‘n Mens kan dus seker nie die gemeenskap kwalik neem dat hulle die geleentheid hoofsaaklik met die seunskole se epiese rugby wedstryd assosieer nie. Dit is egter amper vyftig jaar gelede wat HMS teen die vroulike been van Paarl Gimnasium begin meeding het, en as ek daaraan dink, Betty Friedan haar boek Feminine Mystique geskryf het. Om die waarheid te sê vroue word al meer as ‘n honderd jaar toegelaat om te stem, maar nie toegelaat om die vaandel van interskole te dra nie. Hulle deelname word onder ‘n sluier bedek.
Hierdie gefluister oor wie HJS se susterskool in interskole is, sal net wyk as ons, ons plek voltstaan. Dit is dus gepas dat Hoër Meisieskool Paarl vanjaar as gasskool ‘n herlewing tot die interskole tradisie bring met die waardes van SINERGIE, MOED, VRIENDELIKHEID EN DANKBAARHEID. HMS Paarl is ook vanjaar 146 jaar oud en volgens ons die pêrel van die Paarl. Haar akkerbome vertel stories van menigte netbal- en tenniswedstryde wat voor dit plaasgevind het en dit vertel stories van interskoles wat in eie reg gewen en verloor is.
Dit voel vir my asof ons meisies vanjaar na die drie jaar van afwesigheid van die interskole, die geleentheid vir hulself toe-eien. Hulle het in getalle bymekaar gekom en die strate in hulle kleure versier. Hulle het van skaak tot netbal met trots ondersteun. Vir ons maak dit nie saak of jy F-span of A-span is nie, want as jy deelneem dra jy jou skool op jou hart. Ons het ook ons eie Interskole dansers gehad wat ons onderskeie interskole sportdae geopen het. Ja, vanjaar staan die HMS-leerders van 2022 hul plek by Interskole vol!
Interskole 2022 is ‘n geleentheid om ‘n ou tradisie te laat herleef, maar ook daaraan nuwe inhoud te gee en die pendellum te laat swaai na ‘n geleentheid waar goeie waardes en gelykheid seëvier.
Lank lewe Hoër Meisieskool en mag jou naam tydens Interskole hoog gehou word vanjaar en in die toekoms!
Comments